నాగ సుశీల క్లాప్‌తో ప్రారంభమైన 'శ్రీవైష్ణవి క్రియేషన్స్‌' ప్రొడక్షన్‌ నెం 1 చిత్రం
శ్రీవైష్ణవి క్రియేషన్స్‌ పతాకంపై శ్రీనాగచైతన్య సృజన్‌ సమర్పణలో శశి, చేతన్‌ ప్రధాన పాత్రదారులుగా నవీన్‌సత్య దర్శకత్వంలో అట్లూరి నారాయణరావు నిర్మిస్తున్న ప్రొడక్షన్‌ నెంబర్‌ 1 చిత్రం హైద్రాబాద్‌లో ప్రారంభమైంది. ముహూర్తపు సన్నివేశానికి అక్కినేని నాగార్జున సోదరి నాగసుశీల క్లాప్‌కొట్టగా, చింతలపూడి శ్రీనివాసరావు కెమెరా స్విచ్ఛాన్‌ చేశారు.
ఈ సందర్భంగా చిత్ర దర్శకుడు నవీన్‌ సత్య మాట్లాడుతూ..'ఇదొక వెరైటీ సస్పెన్స్‌ థ్రిల్లర్‌. నూతన నటీనటులతో తెరకెక్కనున్న ఈ చిత్రం రోడ్‌ జర్నీ నేపథ్యంలో ఉంటుంది. ఆద్యంతం ఆకట్టుకుంటుంది. హీరోహీరోయిన్‌లతో పాటు ఇండస్ట్రీకి సంబంధించిన ప్రముఖ నటీనటులు కూడా ఈ చిత్రంలో నటించనున్నారు..' అని అన్నారు.
చిత్ర నిర్మాత అట్లూరి నారాయణరావు మాట్లాడుతూ..'ముందుగా మమ్మల్నీ ఆశీర్వదించడానికి వచ్చిన నాగసుశీల గార్కి, చింతలపూడి శ్రీనివాసరావు గారికి కృతజ్ఞతలు. ఈ చిత్రంలో ప్రేక్షకులకు కావాల్సిన అన్నీ అంశాలు ఉంటాయి. రోడ్‌ జర్నీ నేపథ్యంలో తెరకెక్కే చక్కటి సస్పెన్స్‌ థ్రిల్లర్‌. మా ఎగ్జిక్యూటివ్‌ ప్రొడ్యూసర్‌ ఎమ్‌.వి. కిశోర్‌ ఆధ్వర్యంలో ఈ చిత్రాన్ని భారీగా తెరకెక్కించనున్నాం. డిశంబర్‌ నాలుగోవారం నుండి హైద్రాబాద్‌, బెంగళూర్‌లలో షూటింగ్‌ జరపనున్నాం..' అని అన్నారు.
సంగీత దర్శకుడు మంత్ర ఆనంద్‌ మాట్లాడుతూ..'రీ-రికార్డింగ్‌కి మంచి స్కోప్‌ ఉన్న చిత్రమిది. సరికొత్త ట్యూన్స్‌తో యూత్‌తో పాటు అన్ని వర్గాల ప్రేక్షకుల్ని ఆకట్టుకునే సంగీతాన్ని ఈ చిత్రానికి అందించబోతున్నందుకు ఆనందంగా ఉంది...' అన్నారు.
ఇంకా ఈ కార్యక్రమంలో ఎగ్జిక్యూటివ్‌ ప్రొడ్యూసర్‌ ఎమ్‌.వి. కిశోర్‌, డిఓపి అరుణ్‌ తదితరులు పాల్గొన్నారు.
