13 February 2018
Hyderabad
శివ తత్వము
ముల్లోకములను ముంచేయు దివిజను
పిడికిలి మూయునంత సుళువుగా
మూడు ముళ్ళు వేసి వడిసిపట్టు వేళ
నచ్చిన నెచ్చిలిని దక్కించుకొన్న దక్షిణామూర్తి
తలకెక్కించుకున్న భక్తుని వరముతో
తలమీదికే తెచ్చుకున్న వైరము వల్ల
తప్పించుకొను తెలివి తలపునకు రాక
పరుగు మంత్రం పఠించుకున్న బేలమూర్తి
విశ్వమంతము చేయు విషమును
గుటక వేసినంత అవలీలగ
పట్టి పురిషెడు పుచ్చుకునే వేళ
పరమునే పట్టించుకునే పరేంగితఙ్ఞుడు
కోరినంతనే కడుపులో కొలువయి
వెలుపలకి వచ్చు విధముగానక
అంధకారమును బంధువు చేసుకునే
ప్రసవము మునుపు పరీస్థితితో పసి పశుపతి
వలచి వచ్చిన వనితను వలదని
కోరికను కలిగించిన మదనుని మరిగించి
మనువు ముహూర్తమున మరణ మృదంగము మ్రోగించిన
మరుభూమి మారాజు ఈ విలయ నటరాజు
మోహమాటాన మగనిపై మనసుపడి
వలపు బేరాన నలుసునొకని మొలిపించి
ప్రాకృతిక నియమములను పరిహసించే
లింగ భేదములను విస్మరించిన లింగమూర్తి
అర్ధమైతే మహిమలు అందకపోతే లీలలు
లెక్కించగలిగితే శివుని తత్వములో ఇవి వేవేలు
