18 March 2018
Hyderabad
నాక - నక్క
ఎప్పుడో ఎక్కడో ఎవరో ఎందుకో
మొదలిచ్చి వదిలిన మరబొమ్మ ఇది
చుక్కల చుట్టూ గోళాలూ గ్రహాలూ
గిరి తప్పక గిరగిరా తిరుగుతూ
తమ క్రమబద్ధమైన కదలికలో
కొత్త కొత్త క్రీడలు సృజించుకుంటూ
సహజాతమైన సమయ పరిమాణముతో పాటు
వియన్మండలిన పరిధి పెంచుకుని పోతూ
అలుపెరగక అంతములో అడుగులు వేసుకుంటూ
తోటి ఆటకుల కూడి ఆడే ఒంటరి ఆట ఇది
ఇరుసు నుండి ఓ పక్కకొరిగిన ఒక్క కారణాన
కాలాల కల్పతరువులు వెలిసెనీ జగాన
ఋతువుకొక రంగు రుచి అనుభూతి
కాలానికొక వేళ వేష భూష
ప్రకృతితో మమేకమైన ప్రాణికోటి
పద్ధతులను కాలనుగుణముగా మార్చుకుంటూ
దివరాత్రాల చీకటివెలుగులలో
జీవన దిశానిర్దేశము చేసుకుంటూ
పరిధులు దాటి పైనెక్కడో జరిగే జగన్నాటకములో
తెలియని పాత్రను తలవంచుకుని పొషించుకునే వింత భూమికిది
అంతరిక్ష గవాక్షాలలో కంటపడని అద్భుతాలకీ
నేల మాళిగలో పూటా దర్శనమిచ్చే దైనిందినానికీ
పేర్లు పుట్టించి పండగలు పెట్టించే సంస్కృతి
అనాదిగా మనిషికి అందివస్తున్న వారసత్వపు ఆస్తి
కొత్త చిగురు వేసినా ఇంట నలుసు చేరినా
చెట్టు మోడు వారిన గుండె ఆట ఆపినా
ఆరంభానికో సంబరం వీడ్కోలులో గాంభీర్యం
తరతరాలుగా మనిషి నేర్చిన జీవన వేదం
అంతు అగుపడని ఈ చిరంతన చక్ర భ్రమణములో
వెళ్ళిపోయినది తిరిగి వస్తుందన్న విషయము వెల్లడి చేయునీ యుగాది
