26 March 2018
Hyderabad
నరావతారం
ఒంటిని మరిగించే అగ్ని గోళాన్ని
పంటి కింద ఫలహారము చేయాలని
గగన తరువులో చదల పండును
తండ్రి ఊతముతో దరికి చేరాలని
ఉవ్వెతున ఎగసి పట్టుకోబోవు పాపానికి
దవడ వాయగొట్టించుకున్న ఫలితానికి
విచక్షణా దక్షుడాయె హనుమ
శిక్షతో శిక్షణందిన కనుమ
ముక్కు మూసుకుని పక్క నక్కిన మునులను
మూడు చెరువుల నీళ్ళు గుక్కతప్పక తాగించి
జన్నముల కోసము తెచ్చిపెట్టిన ద్రవ్యరాసులను
చెట్టుతొర్రలలో దాగుడు మూతలంటూ దాచిపెట్టి
అడ్డాల నాడు అబ్బిన పిల్ల కోతి చేతలతో
గడ్డాల వారిని ముప్పు తిప్పలు పెట్టించి
వారి శాపముతో ఉన్న విద్దెలన్ని మరచిన మారుతి
బలము కండది కాదు గుండెది అని నేర్చెను అప్పటి సంధి
కాల మహిమ వల్ల తను చేయని తప్పులకు
అన్న చేత చావు దెబ్బలు తిన్న చిన్న రాజుకు
న్యాయమైన నడతగ కొండంత అండగా నిలబడిన సమవర్తి
చెరలోని సతిని చేరలేని రాజ్యాన్ని తలచుకుని విలపించు మిత్రునికి
విఙ్ఞతతో వేళకు మాట సాయము విశ్వాసముతో అదనుకు మనిషి సాయముతో
అవసర సమయములో ఉచిత సలహాలతో అక్కర్కకు వచ్చిన ఆప్తహితుడు
కష్టములలో కూడా కలిసి నడచిన జీవిత భాగస్వామి
సుఖములలో కర్తవ్యము గుర్తు చేసిన మనస్సాక్షి
కోతిగా పుట్టి కోటి పుణ్యాల పెంపుగా ఎదిగి
నరునికి వానరునికి వారధిగా నిలచి
కోతి నుండి మనిషి పుట్టెనన్న పరిణామ సిద్ధాంతానికి
నిలువెత్తు రూపముగా నిలచిన ఆంజనేయుడు
హరిహరాంచింతమైన ఆదికావ్యాన్ని
అగ్నిపునీతము చేసిన సూత్రధారుడు